नवी दिल्ली (युवा क्रांती वृतसेवा) : उपराष्ट्रपती पदाच्या निवडणुकीत एनडीएचे उमेदवार सी. पी. राधाकृष्णन १५२ मतांनी विजयी झाले आहेत. या निवडणुकीत इंडिया आघाडीची १५ मतं फुटली आहेत. त्यामुळे विरोधकांच्या गोटात खळबळ उडाली आहे. मंगळवारी झालेल्या मतदानात कोणत्या खासदारांनी क्रॉस व्होटिंग केलं, कोणी जाणूनबुजून मतं अवैध ठरतील याची तजवीज केली, त्या खासदारांचा शोध काँग्रेसकडून घेतला जाणार आहे. त्यासाठी पक्षाकडून बैठक बोलावण्यात येणार आहे.
उपराष्ट्रपती पदाच्या निवडणुकीत इंडिया आघाडीची १५ मतं फुटली. या निवडणुकीत १५ मतं अवैध ठरली. क्रॉस व्होटिंग करणाऱ्यांमध्ये काँग्रेसच्या खासदारांचाही समावेश असल्याची माहिती समोर आली आहे. इंडिया आघाडीतील कोणकोणत्या खासदारांनी एनडीएचे उमेदवार सी. पी. राधाकृष्णन यांना मतदान केलं आणि कोणकोणत्या खासदारांनी मत अवैध ठरेल याची ‘काळजी’ घेऊन मतदान केलं, याचा शोध काँग्रेस घेणार असल्याचं वृत्त सीएनएन-न्यूज१८ नं दिलं आहे.
सी. पी. राधाकृष्णन यांनी प्रथम पसंतीची ४५२ मतं मिळवत विजय मिळवला. त्यांनी इंडिया आघाडीचे उमेदवार सुदर्शन रेड्डी यांचा १५२ मतांनी पराभव केला. राधाकृष्णन यांना ३०० मतं मिळाली. यामुळे काँग्रेसच्या निवडणूक रणनितीवर प्रश्नचिन्ह निर्माण झालं आहे. इंडिया आघाडीतील ३१५ खासदारांनी मतदान केल्याचा दावा काँग्रेस नेते जयराम रमेश यांनी केला होता. पण रेड्डी यांना ३०० मतंच मिळाली आहेत. याचा अर्थ इंडिया आघाडीची १५ मतं फुटलेली आहेत.
सीएनएन-न्यूज १८ नं दिलेल्या माहितीनुसार, क्रॉस व्होटिंग करणारे ७ खासदार महाराष्ट्रातील आहेत. यातील ३ शिवसेना उबाठा आणि ४ काँग्रेसचे असू शकतात. एनडीएचे उमेदवार मूळचे तामिळनाडूचे असल्यानं द्रमुकच्या काही खासदारांची मतंही त्यांना मिळाली असल्याचा संशय आहे. यासोबतच आम आदमी पक्षाच्या काही खासदारांवरही संशय आहे.
उपराष्ट्रपतीच्या निवडणुकीत कोणतीही जोखीम नको यासाठी विरोधी पक्षातील खासदारांसाठी मॉक पोलचं आयोजन करण्यात आलं होतं. मात्र यानंतरही उपराष्ट्रपती पदाच्या निवडणुकीत १५ मतं अवैध ठरली. गुप्त मतदान असल्यानं कोणी जाणूनबुजून स्वत:चं मत अवैध ठरवलं की त्यांच्या हातून चुकून हा प्रकार घडला, हे ओळखणं अवघड आहे.
