नवी दिल्ली, दि. १० नोव्हेंबर (युवा क्रांती वृत्तसेवा):
राजधानी दिल्ली पुन्हा एकदा भीषण स्फोटाने हादरली आहे. लालकिल्ला मेट्रो स्टेशनजवळ शनिवारी दुपारी झालेल्या स्फोटामुळे परिसरात मोठी खळबळ उडाली. या स्फोटात किमान आठ जणांचा मृत्यू झाला असून २४ हून अधिक जण गंभीररीत्या जखमी झाल्याची माहिती समोर आली आहे.
प्राथमिक माहितीनुसार, हा स्फोट मेट्रो स्टेशनलगतच्या पार्किंग परिसरात उभ्या असलेल्या एका कारमध्ये झाला. स्फोटाची तीव्रता एवढी प्रचंड होती की त्या कारचा पूर्णतः चुराडा झाला असून आसपास उभ्या असलेल्या सात ते आठ वाहनांना आग लागून ती जळून खाक झाली.
स्फोटानंतर परिसरात एकच गोंधळ उडाला. नागरिकांची मोठी धावपळ झाली आणि वातावरणात भीतीचे सावट पसरले. घटनेची माहिती मिळताच दिल्ली पोलिस आणि अग्निशमन दलाच्या आठ गाड्या घटनास्थळी दाखल झाल्या. आगीवर नियंत्रण मिळवण्याचे प्रयत्न तातडीने सुरू करण्यात आले आहेत.
स्फोटाचे कारण अद्याप स्पष्ट झालेले नसून, हा अपघाती स्फोट होता की दहशतवादी कारवाई, याचा तपास पोलिसांकडून सुरू आहे. गुन्हे शाखा आणि बॉम्ब स्क्वॉडने घटनास्थळाचा ताबा घेतला असून फॉरेन्सिक तज्ज्ञांकडून पुरावे संकलित केले जात आहेत.
मृत झालेल्या व्यक्तींची ओळख अद्याप पटलेली नाही. पोलिसांनी परिसर सील करून वाहतूक बंद केली असून, आसपासच्या परिसरात सुरक्षा वाढविण्यात आली आहे. या स्फोटामुळे परिसरातील नागरिकांमध्ये भीती आणि असुरक्षिततेचे वातावरण निर्माण झाले आहे.
दरम्यान, केंद्र आणि राज्य प्रशासनाकडून या घटनेचा सखोल तपास करण्याचे निर्देश देण्यात आले आहेत. तसेच, जखमींवर जवळच्या रुग्णालयात उपचार सुरू असून, काहींची प्रकृती चिंताजनक असल्याची माहिती समोर आली आहे.
