मुंबई | (युवा क्रांती वृत्तसेवा) : मुख्य निवडणूक आयुक्त ज्ञानेश कुमार आणि भारतीय निवडणूक आयोगाच्या कारभाराविरोधात मनसेच्या वतीने आज मुंबईत ‘गर्जना मोर्चा’ काढण्यात आला. या मोर्चानंतर मनसे प्रमुख राज ठाकरे यांनी निवडणूक आयोगाच्या कारभारावर तसेच केंद्र आणि राज्यातील सत्ताधारी भाजपावर जोरदार टीका केली. देशभर सुरू असलेली Special Intensive Revision (SIR) प्रक्रिया बेकायदेशीर असल्याचा दावा करत महाराष्ट्रातील SIR प्रक्रिया तातडीने रद्द करण्यात यावी, अशी मागणी राज ठाकरे यांनी केली.
निवडणूक प्रक्रियेतील पारदर्शकता आणि मतदारांच्या हक्कांबाबत प्रश्न उपस्थित करत राज ठाकरे यांनी निवडणूक आयोगाच्या भूमिकेवर आक्षेप नोंदवला. SIR प्रक्रियेमुळे मतदारांच्या नावांबाबत संभ्रम निर्माण होण्याची शक्यता असल्याचे सांगत या प्रक्रियेबाबत सरकार आणि निवडणूक आयोगाने स्पष्ट भूमिका मांडावी, अशी मागणीही त्यांनी केली.
गर्जना मोर्चादरम्यान मनसेच्या कार्यकर्त्यांनी मोठ्या संख्येने सहभाग घेत निवडणूक आयोगाच्या कारभाराविरोधात घोषणाबाजी केली. मोर्चानंतर झालेल्या सभेत राज ठाकरे यांनी केंद्र आणि राज्य सरकारच्या धोरणांवरही टीका केली. महाराष्ट्रातील SIR प्रक्रिया रद्द करण्याची मागणी करत निवडणूक प्रक्रियेत मतदारांचा विश्वास कायम राहणे आवश्यक असल्याचे त्यांनी स्पष्ट केले.
राज ठाकरे यांच्या या भूमिकेमुळे महाराष्ट्रातील SIR प्रक्रियेवरून राजकीय वातावरण पुन्हा तापण्याची शक्यता आहे. दरम्यान, SIR प्रक्रियेबाबत निवडणूक आयोग आणि सरकारची अधिकृत भूमिका काय राहते, याकडे आता राजकीय वर्तुळाचे लक्ष लागले आहे.
