अकोला (युवा क्रांती वृत्तसेवा) : अकोला जिल्ह्यातील मतदारयादीत मोठ्या प्रमाणावर दुबार नावे आढळल्याचे समोर आल्यानंतर निवडणूक व्यवस्थेच्या पारदर्शकतेवर गंभीर प्रश्नचिन्ह निर्माण झाले आहे. मतदारयादीतील या विसंगतीमुळे भावी निवडणुका योग्य आणि निष्पक्ष पद्धतीने पार पडतील का, याबाबत नागरिकांमध्ये संभ्रमाचे वातावरण निर्माण झाले आहे.
महाराष्ट्र नवनिर्माण सेनेचे (मनसे) जिल्ह्यातील नेते आणि कार्यकर्त्यांनी या प्रकरणाबाबत जिल्हा निवडणूक अधिकाऱ्यांकडे औपचारिक लिखित तक्रार दाखल केली आहे. या तक्रारीत दुबार नावे तसेच कालबाह्य नोंदी तातडीने वगळून मतदारयादीचे संपूर्ण शुद्धीकरण करण्यात यावे, अशी जोरदार मागणी करण्यात आली आहे.
मनसे पदाधिकाऱ्यांच्या मते,
“मतदारयादीतील त्रुटी कायम राहिल्यास लोकशाही प्रक्रियेवर आघात होईल. शुद्ध आणि अचूक मतदारयादी निश्चित झाल्याशिवाय निवडणुका घेऊ नयेत,” अशी भूमिका त्यांनी स्पष्ट केली आहे.
या प्रकरणी जिल्हा निवडणूक अधिकारी लवकरच पाहणी करून आवश्यक ती दुरुस्ती करतील, अशी अपेक्षा व्यक्त होत आहे. दरम्यान, राजकीय वर्तुळात या घडामोडींनी चांगलीच खळबळ उडाली असून आगामी निवडणुकीच्या पारदर्शक व्यवस्थेचा कस लागणार आहे.
