शेगांव (युवा क्रांती वृतसेवा) : समाजासाठी उपयुक्त ठरणारे कार्य केवळ सरकारी उपक्रमांतूनच नव्हे, तर तरुणाईच्या सहभागातूनही गती घेते, याची प्रचिती शेगावात नुकत्याच पार पडलेल्या रक्तदान शिबिरात आली. बुलढाणा जिल्ह्याचे पोलीस अधीक्षक डॉ. निलेश तांबे यांच्या मार्गदर्शनाखाली “मिशन परिवर्तन” या सामाजिक उपक्रमाचा भाग म्हणून शहर व ग्रामीण पोलीस ठाण्याच्या वतीने हे शिबिर आयोजित करण्यात आले. शेगावातील कुणबी समाज भवन येथे भरलेल्या या शिबिराला शहरातील नागरिक, स्वयंसेवी संस्था व युवकांनी उत्स्फूर्त प्रतिसाद दिला.
विशेष म्हणजे श्री छत्रपती शिवाजी महाराज मित्र मंडळ, शिवाजीनगर शेगाव या मंडळाच्या कार्यकर्त्यांनी सामूहिकपणे सहभाग घेत रक्तदान करून समाजाप्रती आपली जबाबदारी बजावली. तरुणाईचा हा एकजुटीने केलेला प्रयत्न विशेष दखलपात्र ठरला.
तरुणाईचा जोम
मंडळातील विजय यादव, शिरीष देशमुख, श्याम पाटणे, अभिजीत डांबे, कुणाल सोलंकर, सतीश बोबडे, अमोल सोलंकर, पंकज ठाकूर, ऋषिकेश सोंडकर, आकाश जाधव, पवन रोमन, गजानन फरतटे, गौरव मोरे, गजानन अहिरे, यश माने, भूषण चव्हाण, प्रशांत चांदुरकर, संकेत फाळके, किरण कुमकुले यांच्यासह अनेक सदस्यांनी रक्तदान करताना ‘रक्तदान हेच जीवनदान’ या भावनेची प्रचिती घडवली.
आयोजकांचे समाधान
रक्तदान शिबिर यशस्वी झाल्याबद्दल आयोजकांनी समाधान व्यक्त केले. “समाजातील गरजू रुग्णांना आवश्यक वेळी रक्ताची उपलब्धता व्हावी, हा उद्देश डोळ्यांसमोर ठेवून पोलिसांच्या माध्यमातून हा उपक्रम राबविला जात आहे. यात तरुण मंडळी पुढाकार घेत आहेत, ही आनंदाची बाब आहे,” असे आयोजक मंडळींनी सांगितले.
नागरिकांचे कौतुक
शहरातील नागरिकांनी मंडळाच्या या सामाजिक बांधिलकीचे कौतुक केले. “गणेशोत्सव, क्रिकेट स्पर्धा, सांस्कृतिक कार्यक्रम एवढ्यापुरतेच न थांबता मंडळातील युवक समाजाभिमुख उपक्रमातही पुढाकार घेत आहेत. अशा मंडळांची गरज समाजाला आहे,” अशा प्रतिक्रिया नागरिकांनी दिल्या.
प्रेरणादायी उदाहरण
या शिबिराच्या निमित्ताने तरुणाईने दाखविलेला उत्साह इतर युवक मंडळांसाठी प्रेरणादायी ठरणार आहे. समाजसेवेच्या वाटेवर पावले टाकणाऱ्या या मंडळाने केलेले कार्य निश्चितच कौतुकास पात्र आहे.
- जाचक अटी रद्द करा; शेतकऱ्यांना सरसकट २ लाखांपर्यंत कर्जमाफी द्या — राष्ट्रवादी काँग्रेस (शरदचंद्र पवार)ची मागणी!
- शेगावात बैलांची निर्दयी वाहतूक; दोघांविरुद्ध गुन्हा दाखल!!
- शेगावात किरकोळ कारणावरून दोन गटांत हाणामारी; दगडफेकीत युवक जखमी!!
- जळगाव जामोद वकील संघाच्या अध्यक्षपदी अँड. रूपेश विश्वेकर यांची सर्वानुमते निवड!!
- फिफा विश्वचषक २०२६ निमित्त बुलढाण्यात फुटबॉलचा महाउत्सव; विशेष कार्यक्रम उत्साहात!
