यवतमाळ (युवा क्रांती वृतसेवा): प्रदेश काँग्रेसचे माजी सरचिटणीस देवानंद पवार यांनी पक्षाचा राजीनामा दिला आहे. येत्या १३ सप्टेंबरला महसूलमंत्री चंद्रशेखर बावनकुळे यांच्या प्रमुख उपस्थितीत कार्यकर्त्यांसह भाजपमध्ये प्रवेश करणार आहेत.
काँग्रेसचे माजी मंत्री शिवाजीराव मोघे व देवानंद पवार यांच्यात गेल्या ११ वर्षांपासून वाद आहे. २०१४च्या लोकसभा निवडणुवेळी मोघे यांचे निकटवर्तीय म्हणून पवार कार्यरत होते. जितेंद्र मोघे राजकारणात सक्रिय झाल्यानंतर पवार यांचा प्रभाव कमी करण्याचा प्रयत्न झाला. यातूनच मोघे विरुद्ध पवार यांच्यातील वाद वाढत गेला. २०१४, २०१९च्या विधानसभा निवडणुकीत आर्णी-केळापूर मतदारसंघातून शिवाजीराव मोघे यांचा पराभव झाला.
२०२४मध्ये त्यांचा मुलगा जितेंद्र मोघे यांचा पराभव झाला. या पराभवास पवार जबाबदार असल्याचा आरोप मोघे पिता-पुत्रांचा आहे. ‘गद्दार’ म्हणूनही त्यांच्यावर ठपका ठेवण्यात आला. हा वाद वाढून नव्या पिढीतील नेत्यांनी जुन्यांविरुद्ध बंड पुकारले होते. माजी मंत्री सुनील केदार यांनी यवतमाळला जावून अहवाल तयार केला होता. हे सारे घडत असतानाच पवार यांनी राजीनामा दिला.
प्रवीण देशमुख राष्ट्रवादीत जाणार?
काँग्रेसमधील सहकार नेते प्रवीण देशमुख यांनी आपल्याविरोधात काम केल्याने त्यांना पक्षातून काढण्याची मागणी माजी मंत्री प्रा. वसंत पुरके यांनी प्रदेशाध्यक्षांकडे केली आहे. आपण प्रामाणिकपणे काम केले. प्रा. पुरके यांच्याविषयी नाराजीतून त्यांचा पराभव झाल्याचे देशमुख यांनी म्हटले आहे. देशमुख हे काँग्रेसला सोडचिठ्ठी देऊन लवकरच राष्ट्रवादी काँग्रेसमध्ये जाणार असल्याची चर्चा आहे .
