बुलढाणा | (जिमाका) (युवा क्रांती वृत्तसेवा) : दि. ३० सप्टेंबर – बुलढाणा येथील राजमाता जिजाऊ शासकीय वैद्यकीय महाविद्यालय व जिल्हा रुग्णालयात दिव्यांग व्यक्तींच्या तपासणी व दिव्यांग प्रमाणपत्र वितरणासाठी ऑनलाइन प्रणाली सुरू करण्यात आली आहे. त्यामुळे १ ऑक्टोबर २०२६ पासून दर बुधवार व शुक्रवार घेण्यात येणारी दिव्यांग तपासणी बोर्डाची ऑफलाइन प्रक्रिया पूर्णपणे बंद करण्यात येणार आहे.
जिल्हा रुग्णालय, बुलढाणा येथे आतापर्यंत दिव्यांग व्यक्तींच्या तपासणीसाठी प्रत्येक महिन्यातील बुधवार व शुक्रवार दिव्यांग बोर्ड घेण्यात येत होता. तसेच दिव्यांग प्रमाणपत्र वितरणाची प्रक्रिया ऑफलाइन पद्धतीने केली जात होती. आता शासकीय वैद्यकीय महाविद्यालयाकडून राजमाता जिजाऊ शासकीय वैद्यकीय महाविद्यालय व जिल्हा रुग्णालयाला ऑनलाइन प्रणालीसाठी आवश्यक आयडी व पासवर्ड उपलब्ध करून देण्यात आले आहेत.
या सुविधेमुळे जिल्हा रुग्णालयातील दिव्यांग प्रमाणपत्र वितरण प्रणाली ऑनलाइन पद्धतीने सुरू झाली आहे. परिणामी, १ ऑक्टोबर २०२६ पासून बुधवार व शुक्रवारची पूर्वीची ऑफलाइन तपासणी प्रक्रिया बंद करण्यात येत आहे.
दिव्यांग व्यक्तींनी तपासणी तसेच दिव्यांग प्रमाणपत्रासंदर्भातील आवश्यक कार्यवाहीसाठी राजमाता जिजाऊ शासकीय वैद्यकीय महाविद्यालय व जिल्हा रुग्णालय, बुलढाणा येथील संबंधित कर्मचाऱ्यांशी संपर्क साधावा, असे आवाहन जिल्हा शल्यचिकित्सकांनी केले आहे. ऑनलाइन प्रणाली सुरू झाल्यामुळे दिव्यांग प्रमाणपत्राच्या प्रक्रियेत सुलभता आणि अधिक सुव्यवस्थित कार्यवाही होण्यास मदत होणार आहे.
