छत्तीसगड (युवा क्रांती वृत्तसेवा) : छत्तीसगडच्या बीजापूर जिल्ह्यात नक्षलवाद्यांनी पुन्हा एकदा दहशतीचे सावट पसरवले आहे. उसूर पोलीस ठाण्याच्या हद्दीतील नेलाकांकेर गावात दोन निष्पाप गावकऱ्यांची क्रूरपणे हत्या करण्यात आल्याची माहिती समोर आली आहे. या घटनेमुळे परिसरात भीतीचे सावट अधिक गडद झाले आहे.
घडलेल्या हत्येच्या घटनेमुळे संपूर्ण परिसरात भीतीचे व दहशतीचे वातावरण पसरले असून, स्थानिकांनी सुरक्षेची मागणी अधिक तीव्र केली आहे. दरम्यान, पोलिसांनी घटनास्थळ गाठून तपास सुरू केला आहे. नक्षलवाद्यांचा शोध घेण्यासाठी परिसरात शोधमोहीम हाती घेण्यात आली आहे.
याच पार्श्वभूमीवर, केंद्रीय गृहमंत्री अमित शाह यांनी अलिकडेच मार्च 2026 पर्यंत देशातून नक्षलवादाचा पूर्णतः नाश करण्याची घोषणा केली होती. मात्र बीजापूरसारख्या दुर्गम भागांतील सततच्या घटनांमुळे प्रशासन व सुरक्षा यंत्रणेच्या आव्हानांमध्ये अधिक वाढ होत असल्याचे स्पष्ट होते.
स्थानिक नागरिक भीतीत जीवन जगत असले तरीही, सरकार व सुरक्षा दलांकडून नक्षलवाद निर्मूलनासाठी प्रयत्न वेगाने सुरू असल्याचे आश्वासन दिले जात आहे.
