शेगाव (युवा क्रांती वृत्तसेवा) : भीमनगर परिसरातून बेपत्ता झालेल्या २० वर्षीय तरुणाचा शोध घेण्यासाठी शेगाव शहर पोलिसांनी राबवलेले ‘ऑपरेशन शोध’ यशस्वी ठरले असून, काही तासांतच तरुणाला सुखरूप शोधून काढण्यात पोलिसांना यश आले आहे.
मिळालेल्या माहितीनुसार, दिनांक २४ एप्रिल रोजी वनिता राजेंद्र शेगोकार यांनी शेगाव शहर पोलीस ठाण्यात तक्रार दाखल केली होती. त्यांच्या तक्रारीनुसार, त्यांचा भाऊ तेजस राजेंद्र शेगोकार (वय २०) हा २२ एप्रिल रोजी दुपारी घरातून बाहेर पडला होता; मात्र त्यानंतर तो परत आला नव्हता. प्राथमिक चौकशीत तिघा संशयितांनी त्याला “छोट्या हत्ती” वाहनातून नेल्याची माहिती समोर आली होती.
प्रकरणाची गंभीर दखल घेत पोलिसांनी तात्काळ स्वतंत्र पथके तयार करून शहरासह परिसरात शोधमोहीम सुरू केली. सीसीटीव्ही फुटेज, माहितीदारांचे जाळे आणि तांत्रिक तपासाच्या आधारे पोलिसांनी विविध दिशांनी तपासाची चक्रे फिरवली.
दरम्यान, वाशिम पोलीस स्टेशनच्या हद्दीत, वाशिम येथील एका रसवंतीच्या दुकानासमोर संबंधित तरुण आढळून आला. वाशिम पोलिसांकडून माहिती मिळताच शेगाव पोलिसांचे पथक तातडीने तेथे पोहोचले आणि तरुणाला सुरक्षित ताब्यात घेतले.
विशेष म्हणजे, संबंधित तरुणाला व्यवस्थित बोलता येत नसल्याने त्याचा शोध घेणे हे पोलिसांसाठी मोठे आव्हान होते. मात्र सातत्यपूर्ण प्रयत्न आणि समन्वयामुळे हे ऑपरेशन यशस्वी ठरले.
त्यानंतर तरुणाला शेगाव येथे आणून त्याच्या वडिलांच्या स्वाधीन करण्यात आले. मुलगा सुखरूप परत मिळाल्याने कुटुंबीयांनी पोलिसांचे आभार मानले.
या कारवाईला पोलीस निरीक्षक निमिष मेहेत्रे यांच्या मार्गदर्शनाखाली दिशा मिळाली. त्यांच्या नेतृत्वाखाली सहाय्यक पोलीस निरीक्षक गजानन सोनटक्के, पोलीस उपनिरीक्षक कुणाल जाधव, हेड कॉन्स्टेबल गणेश वाकेकर, हेड कॉन्स्टेबल रवी इंगळे तसेच कॉन्स्टेबल उज्वल शिंदे यांनी उल्लेखनीय कामगिरी बजावली.
एकूणच, शेगाव शहर पोलिसांनी पुन्हा एकदा आपली तत्परता आणि कार्यक्षमता सिद्ध करत नागरिकांच्या सुरक्षेबाबतची बांधिलकी अधोरेखित केली आहे.
