प्रतिनिधी : राज्य सरकारच्या पुण्यश्लोक अहिल्यादेवी होळकर शेतकरी कर्जमुक्ती योजनेअंतर्गत पात्र शेतकऱ्यांसाठी मोठी दिलासादायक बातमी समोर आली आहे. योजनेतील दुसरी लाभार्थी यादी अधिकृत पोर्टलवर प्रसिद्ध करण्यात आली असून, सुमारे 17 लाख शेतकऱ्यांची नावे अपलोड करण्यात आली आहेत. त्यामुळे राज्यातील लाखो शेतकऱ्यांना कर्जमुक्ती प्रक्रियेला गती मिळणार आहे.
या दुसऱ्या यादीत राज्यातील पाच जिल्ह्यांमधील प्रत्येकी एक लाखांहून अधिक शेतकऱ्यांचा समावेश करण्यात आला आहे. त्यामुळे या जिल्ह्यांतील पात्र शेतकऱ्यांना योजनेचा सर्वाधिक लाभ मिळणार असल्याचे स्पष्ट झाले आहे.
मात्र, कोकण आणि विदर्भ विभागातील अनेक जिल्ह्यांमध्ये लाभार्थी शेतकऱ्यांची संख्या तुलनेने कमी असल्याचे या यादीतून दिसून आले आहे. त्यामुळे या भागातील पात्र शेतकऱ्यांची संख्या कमी आहे की पडताळणीची प्रक्रिया अद्याप सुरू आहे, याकडेही लक्ष वेधले जात आहे.
राज्य सरकारने पात्र शेतकऱ्यांना अधिकृत पोर्टलवर जाऊन स्वतःचे नाव तपासण्याचे आवाहन केले आहे. ज्यांचे नाव दुसऱ्या यादीत आले आहे, त्यांनी पुढील आवश्यक प्रक्रिया वेळेत पूर्ण करावी, असेही प्रशासनाने स्पष्ट केले आहे.
कर्जमाफी योजनेमुळे आर्थिक अडचणीत सापडलेल्या शेतकऱ्यांना मोठा दिलासा मिळणार असून, शेतीसाठी नव्याने आर्थिक नियोजन करण्यास मदत होणार आहे. सरकारकडून पुढील टप्प्यात आणखी पात्र शेतकऱ्यांच्या याद्या प्रसिद्ध केल्या जाण्याची शक्यता व्यक्त केली जात आहे.
