बुलढाणा(आकाश बोरसे) : दि 23 एप्रिल-केंद्रीय आयुष राज्यमंत्री (स्वतंत्र प्रभार) तथा आरोग्य व कुटुंब कल्याण राज्यमंत्री प्रतापराव जाधव यांनी जिल्हाधिकारी कार्यालयातील नियोजन सभागृहात जिल्हा आरोग्य यंत्रणेचा सविस्तर आढावा घेतला. यावेळी त्यांनी जिल्ह्याच्या वाढत्या लोकसंख्येचा विचार करून लवकरच 16 नवीन प्राथमिक आरोग्य केंद्रे आणि 51 उपकेंद्रे सुरू करण्यात येणार असल्याची महत्त्वपूर्ण घोषणा केली.
बैठकीस जिल्हाधिकारी डॉ. प्रविणकुमार देवरे, मुख्य कार्यकारी अधिकारी गुलाबराव खरात, तसेच आरोग्य विभागातील वरिष्ठ अधिकारी उपस्थित होते.
जिल्ह्यातील विद्यमान आरोग्य सुविधा
सध्या जिल्ह्यात 1 शासकीय वैद्यकीय महाविद्यालय, जिल्हा रुग्णालय, 1 जिल्हा स्त्री रुग्णालय, जिल्हा क्षयरोग रुग्णालय, 3 सामान्य व उपजिल्हा रुग्णालये, 14 ग्रामीण रुग्णालये, 57 प्राथमिक आरोग्य केंद्रे, 282 उपकेंद्रे, 10 ‘हिंदुहृदयसम्राट बाळासाहेब ठाकरे आपला दवाखाना’ आणि 40 नागरी आयुष्मान आरोग्य मंदिरे कार्यरत आहेत.
जिल्ह्याने आरोग्य निर्देशांकात चांगली कामगिरी केली असून जन्मदर 13.92, बालमृत्यू दर 8.09 आणि माता मृत्यू दर 23 इतका नियंत्रित ठेवण्यात यश मिळाले आहे.
मंत्री जाधवांचे महत्त्वाचे निर्देश
मंत्री जाधव यांनी आरोग्य सेवेला “सर्वात मोठी सेवा” संबोधत ती सकारात्मक भावनेतून करण्याचे आवाहन केले. त्यांनी पुढील महत्त्वाच्या सूचना दिल्या:
- ग्रामीण आरोग्य केंद्रांवर डॉक्टरांची उपस्थिती अनिवार्य; दिवसातून दोन वेळा बायोमेट्रिक हजेरी
- रिक्त पदे तात्काळ भरण्यासाठी प्रशासनाने पावले उचलावीत
- पोलीस स्टेशन असलेल्या गावांतील आरोग्य केंद्रांवर शवविच्छेदन सुविधा सुरू करावी
- सर्व शासकीय रुग्णालयांत CCTV, फायर व गॅस ऑडिट अनिवार्य
- प्रत्येक तालुक्यात डायलेसिस सेंटर व ब्लड बँक सुरू करण्याचा प्रस्ताव पाठवावा
रुग्णसेवेसाठी विशेष भर
- कोव्हिड काळातील अतिरिक्त साहित्य (बेड, ऑक्सिजन टँक) गरजू रुग्णालयांना वितरित करावे
- कोणत्याही रुग्णाला विनाकारण रेफर न करता स्थानिक पातळीवर उपचार द्यावेत
- ‘जन औषधी’ केंद्रातून स्वस्त औषधे उपलब्ध करून द्यावीत
आरोग्य मोहिमा आणि जनजागृती
- राष्ट्रीय अंधत्व कार्यक्रमांतर्गत मोफत चष्मे वाटप व मोतीबिंदू शस्त्रक्रिया वाढवणे
- टीबी निर्मूलनासाठी ‘निक्षय मित्र’ संकल्पना अधिक प्रभावी करणे
- एचपीव्ही लसीबाबत जनजागृती व महिलांसाठी कॅन्सर तपासणी मोहिमा
- मानसिक आरोग्य तपासणीवर विशेष लक्ष
आयुष्मान भारत योजनेवर भर
आयुष्मान भारत हेल्थ कार्ड योजना अंतर्गत 15 एप्रिल 2026 पर्यंत जिल्ह्यात 9.82 लाख कार्डे मंजूर झाली असली तरी उर्वरित लाभार्थ्यांपर्यंत योजना पोहोचवण्यासाठी व्यापक मोहीम राबवण्याचे निर्देश देण्यात आले.
इतर सूचना
- दूषित पाणीपुरवठा थांबवण्यासाठी तातडीने उपाययोजना
- सर्व रुग्णालयांत आवश्यक औषधसाठा उपलब्ध ठेवणे
बैठकीदरम्यान उत्कृष्ट कामगिरी करणाऱ्या प्राथमिक आरोग्य केंद्रातील वैद्यकीय अधिकाऱ्यांचा सत्कार करण्यात आला, तर कामात कुचराई करणाऱ्यांविरुद्ध वेतनवाढ रोखण्याचे निर्देशही देण्यात आले.
जिल्हा आरोग्य अधिकारी डॉ. अमोल गीते यांनी प्रास्ताविकात बुलढाणा जिल्हा आरोग्य क्षेत्रात राज्यात अग्रेसर असल्याचे नमूद केले. ‘माझा गाव आरोग्य संपन्न’ मोहिमेसाठीही जिल्ह्याला राज्यस्तरीय पुरस्कार मिळवण्याचे प्रयत्न सुरू असल्याची माहिती त्यांनी दिली. या बैठकीला जिल्ह्यातील सर्व वरिष्ठ आरोग्य अधिकारी आणि संबंधित यंत्रणांचे प्रतिनिधी उपस्थित होते. (युवा क्रांती वृत्तसेवा)
