जिल्ह्यात “शून्य कुष्ठरुग्ण गाव सर्व्हेक्षण अभियान २०२६-२७” सुरू; ९ लाख १९ हजार नागरिकांची होणार तपासणी!!

बुलढाणा, (युवा क्रांती वृत्तसेवा) : दि. २९ मे-महाराष्ट्र शासनाच्या आदेशानुसार बुलढाणा जिल्ह्यात “शून्य कुष्ठरुग्ण गाव सर्व्हेक्षण अभियान २०२६-२७” राबविण्यात येत असून, १८ मे ते १८ जून २०२६ या कालावधीत जिल्ह्यातील ७३३ गावांमध्ये घरोघरी जाऊन सर्वेक्षण करण्यात येणार आहे. या मोहिमेद्वारे सुमारे ९ लाख १९ हजार ५०५ नागरिकांची शारीरिक तपासणी केली जाणार आहे.

अभियानासाठी जिल्हाभर प्रशिक्षित तपासणी पथके तयार करण्यात आली असून आरोग्य केंद्र स्तरावर सर्वेक्षणाची पाहणी केली जाणार आहे. तसेच तालुका व जिल्हास्तरीय अधिकारी मोहिमेचे पर्यवेक्षण आणि सनियंत्रण करणार आहेत.

जिल्हा परिषद बुलढाणा येथील छत्रपती शिवाजी सभागृहात झालेल्या आढावा बैठकीत जिल्हा आरोग्य अधिकारी डॉ. अमोल गीते यांच्या मार्गदर्शनाखाली सहाय्यक संचालक आरोग्य सेवा (कुष्ठरोग) डॉ. हरी पवार यांनी मोहिमेची माहिती दिली. यावेळी डॉ. के. व्ही. राठोड यांनी कुष्ठरोगाची लक्षणे, निदान व उपचाराबाबत मार्गदर्शन केले.

जिल्हास्तरावर वैद्यकीय अधिकारी, समुदाय आरोग्य अधिकारी, आरोग्य सहाय्यक, आरोग्य सहाय्यिका, आशा गटप्रवर्तक, आरोग्य सेविका आणि आरोग्य सेवक यांना प्रशिक्षण देण्यात आले आहे. प्राथमिक आरोग्य केंद्र स्तरावरही संबंधित कर्मचाऱ्यांना प्रशिक्षण दिले गेले आहे.

या मोहिमेत जास्तीत जास्त संशयित रुग्णांचा शोध घेऊन त्यांचे निदान व उपचार सुरू करण्यावर भर देण्यात येत आहे. कुष्ठरोग उपचाराने पूर्णपणे बरा होऊ शकतो आणि सर्व शासकीय रुग्णालयांमध्ये मोफत उपचार उपलब्ध असल्याचे आरोग्य विभागाने स्पष्ट केले आहे. नागरिकांनी शरीरावरील चट्टे, गाठी किंवा इतर संशयित लक्षणांची तपासणी करून घ्यावी आणि मोहिमेला सहकार्य करावे, असे आवाहन करण्यात आले आहे.