उद्दिष्टाच्या केवळ 15.14 टक्के कर्जाचे वितरण; राष्ट्रीयकृत व ग्रामीण बँकांची संथ कामगिरी!
धाराशिव (युवा क्रांती वृत्तसेवा) दि. 19 जुलै : खरीप हंगामाची पेरणी अंतिम टप्प्यात असतानाही धाराशिव जिल्ह्यात पीक कर्ज वाटपाची प्रक्रिया अपेक्षित गतीने होत नसल्याचे चित्र आहे. विशेषतः राष्ट्रीयकृत आणि ग्रामीण बँकांच्या संथ कारभारामुळे अनेक शेतकऱ्यांना वेळेवर पीक कर्ज मिळत नसल्याने त्यांच्या अडचणीत वाढ झाली आहे.
जून अखेरच्या आकडेवारीनुसार, खरीप हंगाम 2026-27 साठी जिल्ह्यात निश्चित करण्यात आलेल्या पीक कर्ज वाटपाच्या उद्दिष्टापैकी केवळ 15.14 टक्के कर्जाचेच वितरण झाले आहे. त्यामुळे बहुतांश शेतकरी अद्याप पीक कर्जाच्या प्रतीक्षेत आहेत.
पीक कर्ज वाटपात जिल्हा मध्यवर्ती सहकारी बँकेने (डीसीसी बँक) 44.57 टक्के कर्जवाटप करून आघाडी घेतली आहे. मात्र, राष्ट्रीयकृत बँकांची कामगिरी केवळ 10.47 टक्क्यांवर थांबली असून ग्रामीण बँकांचाही प्रतिसाद अपेक्षेप्रमाणे नसल्याचे दिसून येत आहे.
खरीप हंगामात बियाणे, खते, औषधे आणि इतर शेतीविषयक खर्च भागविण्यासाठी पीक कर्ज महत्त्वाची भूमिका बजावते. मात्र, कर्ज वितरणातील विलंबामुळे अनेक शेतकऱ्यांना आर्थिक अडचणींचा सामना करावा लागत असून काहींना खासगी स्रोतांकडून कर्ज घेण्याची वेळ येत आहे.
शेतकरी संघटनांनी पीक कर्ज वितरणाला तातडीने गती देण्याची मागणी केली आहे. तसेच पात्र शेतकऱ्यांना विलंब न लावता कर्ज उपलब्ध करून देण्यासाठी संबंधित बँका आणि प्रशासनाने प्रभावी उपाययोजना कराव्यात, अशी अपेक्षा व्यक्त केली जात आहे.
